जीवनप्रवाह

जीवनाच्या प्रवाहात वाहताना
        मी पिंपळपान झालो...
पाण्यामधे कुजून कुजून
        जाळीदार नक्षी झालो !

जीवनाच्या प्रवाहात वाहताना
        मी एक ओंडका झालो...
लाटांना धडका देत देत
        निरंतर तरंगत राहीलो !

जीवनाच्या प्रवाहात वाहताना
        मी उग्र प्रपात झालो...
खडकावर आदळून आपटून
        शांत शांत नदी झालो !

जीवनाच्या प्रवाहात वाहताना
        मी डोंगरी निर्झर झालो...
कड्याकपारीतून वाट काढीत
        झुळूझुळू वाहत राहीलो !

जीवनाच्या प्रवाहात वाहताना
        मी माझंच जीवन झालो
रोज रोज मरुन सुध्दा
         आनंदाने जगत राहीलो !

               ---डॉ शिवाजी काळे.