वेदनाच ती.....

वेदनाच ती......

तशी प्रत्येकालाच भेटते
आयुष्यात कधीतरी ,
बऱ्याचदा थोडा वेळ तर
कधी जास्त साथ देते ती...

मलाही लहानपणापासून
भेटायची अल्प काळासाठी,
जरा साथ द्यायची अन्
परतण्यासाठी निघून जायची ती...

एकदा अशीच भेटली
म्हणाली माझा स्वीकार करशील,
अन् नकळत माझ्यातच
पूर्ण सामावून गेली ती...

कधी असते सर्वसाधारण
तर कधी होते सैरभैर,
तिचं माझ्यातलं अस्तित्व
मला जाणवून देतेच ती...

तसं शीतयुद्ध आहे आमचं
कधीतरी माझा विजय,
पण  बऱ्याच  वेळा
मला  हरवतेच  ती...

मंजूर आहे मलाही
तिच्याकडून नेहमीच हरणं,
कारण सुख-दुःख न्
सामंजस्याची जाणीवच् ती...

          ------डॉ माधुरी----